हेटौंडाः नुवाकोटमा जारी बागमती प्रदेश लिग फुटबल प्रतियोगितामा मकवानपुरको लिग विजेता टिम डाँफे युवा क्लब पराजित भएको छ । बुधबार भएको सेमीफाइनल खेलमा मकवानपुरको डाँफे धादिङ जिल्लाको लिग विजेता धादिङ समाजसँग पराजित भएको हो । डाँफे ३–१ गोलअन्तरले पराजित भएको हो ।
यस्तै अर्को सेमीफाइनल खेलमा काठमाडौंको वाइल्ड स्पोर्टस् एक्सपर्टले सिन्धुपाल्चोकको न्यू जेनेरेशन युवा क्लबलाई पराजित गर्दै फाइनल प्रवेश गरेको छ । वाइल्ड स्पोर्टस्ले न्यू जेनेरेशन युवा क्लबलाई २–० गोलअन्तरले पराजित गरेको हो । उपाधीका लागि धादिङ समाज र वाइल्ड स्पोर्टस् भिड्ने भएको छ ।
प्रतियोगिताको विजेताले ५ लाख रुपैयाँ नगदसहित शिल्ड, मेडल तथा प्रमाणपत्र प्राप्त गर्नेछ भने उपविजेताले दुई लाख ५० हजार रुपैयाँ नगदसहित शिल्ड, मेडल तथा प्रमाणपत्र प्राप्त गर्नेछ । प्रदेश लिगको फाइनल खेल भोलि शुक्रबार नुवाकोटको आदर्श बहुमुखी क्याम्पसको खेलमैदानमा हुनेछ ।
