हेटौंडाः २० किलो लागुऔषध गाँजासहित एकजनालाई मकवानपुर प्रहरीले मंगलबार पक्राउ गरेको छ । जिल्ला प्रहरी कार्यालय मकवानपुरबाट प्रहरी सहायक निरीक्षक शिवराज गुरुङको कमाण्डमा खटिएको प्रहरी टोलीले हेटौंडा–३, लेवटबाट मंगलबार दिउँसो १२ बजेको समय पर्सा जिल्ला बीरगन्ज महानगरपालिका–३२ का १९ वर्षीय सञ्जय महतोलाई लागूऔषध गाँजासहित पक्राउ गरिएको जिल्ला प्रहरी कार्यालय मकवानपुरले जनाएको छ ।
शंकास्पद अवस्थामा बीरगन्जतर्फ जाने गाडी कुरिरहेका महतोको साथमा रहेको झोलामा लागुऔषध गाँजा २० केजी बरामद भएको प्रहरीको भनाइ छ । महतोलाई नियन्त्रणमा लिएर प्रहरीले थप अनुसन्धान गरिरहेको जनाएको छ ।
यस्तै मकवानपुर प्रहरीले आज एकजना फरार प्रतिवादीलाई पनि पक्राउ गरेको छ । चेक अनादर मुद्दामा दोषी ठहर भई फरार भएकी हेटौंडा–१ की ५५ वर्षीया कमला श्रेष्ठलाई प्रहरीले मंगलबार पक्राउ गरेको जनाएको छ । जिल्ला अदालत मकवानपुरले २०७५ साल भदौ २५ गते चेक अनादर मुद्दामा दोषी ठहर गरेको प्रहरीले उल्लेख गरेको छ ।
