हेटौंडाः हेटौंडा–१५ स्थित चित्रेपानी सामुदायिक वनबाट सालको काठसहित दुईजनालाई मकवानपुर प्रहरीले पक्राउ गरेको छ । वनबाट सालको गोलिया काटेर ओसार्दै गरेको अवस्थामा आइतबार राती १० बजेर ४५ मिनेटको समयमा ईलाका प्रहरी कार्यालय पशुपतिनगरबाट खटिएको प्रहरी गस्ती टोलीले हेटौंडा–१५ का २४ वर्षीय बुद्ध लामा लोप्चन र २५ वर्षीय विक्रम रुम्बालाई पक्राउ गरेको जिल्ला प्रहरी कार्यालय मकवानपुरले जनाएको छ ।
सामुदायिक वनबाट सालको रुख काटेर प्रदेश ३–०३–००१ ह ०१४० नम्बरको अटोमा साढे २ क्युफिट लोड गरेको अवस्थामा र सोही वनक्षेत्रमा २० दशमलव ५४ क्युफिट काठ बरामद गरेको प्रहरीले जनाएको छ । काठ ढुवानी गर्न प्रयोग गरेको अटोसहित पक्राउ परेका बुद्ध र बिक्रमलाई प्रहरीले नियन्त्रणमा लिएर आवश्यक कारवाहीका लागि डिभिजन वन कार्यालय मकवानपुर पठाएको छ ।
