हेटौंडाः बागमती प्रदेश लिग फुटबल प्रतियोगितामा मकवानपुरबाट न्यु डाँफे युथ क्लबले सहभागिता जनाउने भएको छ । अखिल नेपाल फुटबल संघ (एन्फा) को आयोजनामा नुवाकोट जिल्लामा हुने लिगमा मकवानपुरसहित बागमती प्रदेशका १० जिल्लाको टिमको सहभागिता रहनेछ ।
नुवाकोटस्थित आदर्श बहुमुखी क्याम्पसको खेलमैदानमा प्रदेशस्तरीय लिग फुटबल प्रतियोगिता यही बिहीबारदेखि सुरु हुने मकवानपुर जिल्ला फुटबल संघका अध्यक्ष टीका लामाले जानकारी दिनुभएको छ । बागमती प्रदेशका १३ जिल्लामध्ये भक्तपुर, रसुवा र रामेछाप जिल्लाले भने सहभागिता जनाएको छैन ।
लिगका सहभागी टिमलाई तीन समूहमा विभाजन गरिएको खेल तालिकामा मकवानपुरको न्यु डाँफे युथ क्लब समूह ‘सी’मा परेको छ । उक्त समूहमा काठमाडौंको वाइल्ड स्पोर्टस् एक्सपोर्टस् र काभ्रेको आकाश भैरब क्लब रहेको छ । मकवानपुरको टिमले फागुन ९ गते काभ्रेसँग र फागुन ११ गते काठमाडौंसँग खेल्नेछ ।
लिगको समूह ‘ए’मा ललितपुरको मखिपोट युवा क्लब, चितवनको सौराहा युवा समाज र सिन्धुपाल्चोकको न्यु जेनेरेसन युवा क्लब रहेको छ । यसैगरी समूह ‘बी’मा नुवाकोटको नुवाकोट युनाइटेड फुटबल क्लब, धादिङको धादिङ समाज, दोलखाको टाइगर टिम तिख्रातल र सिन्धुलीको नमुना जनउत्थान क्लब गरी चार टिम रहेका छन् ।
फागुन १४ गतेसम्म चल्ने प्रतियोगिताको सेमिफाइनल खेल फागुन १२ गते हुनेछ । समूह ‘ए’को विजेतासँग समूह ‘सी’को विजेताले पहिलो सेमिफाइनल खेल्नेछ भने समूह ‘बी’को विजेताले समूह ए, बी र सीको उत्कृष्ट उपविजेतासँग दोस्रो सेमिफाइनल खेल्नेछ । लिगको उपाधि विजेता टिमले नगद ५ लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेता टिमले नगद २ लाख ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ ।
