हेटौंडाः मकवानपुरको मनहरी गाउँपालिकाले निर्माण गर्न लागेको हाँडीखोला पक्की पुलको बिहीबार बागमती प्रदेशका मुख्यमन्त्री डोरमणि पौडेलले शिलान्यास गर्नुभएको छ । हाँडीखोला र कालीदमार जोड्ने पक्कीपुलको शिल्यान्यास गर्नुहुँदै मुख्यमन्त्री पौडेलले सपना देखेपछि मात्रै पूरा हुने भन्दै पहिला सपना देख्नुपर्ने बताउनुभयो ।
मनहरी गाउँपालिकाले ठूलो आँट र अठोट लिएर एक–दुई वर्षको वार्षिक बजेट बराबरको पुल निर्माण गर्ने सपना देखेसँगै काम भएको बताउनुभयो । उहाँले मनहरी गाउँपालिकाले एकै वर्षमा ५३ करोडको लागतमा ५ वटा पुलको टेन्डर गरेर सम्झौता गर्नु सपनाजस्तै भएको बताउनुभयो ।
३५ मिटर लम्बाई भएको हाँडीखोला पक्कीपुल ५ करोड ३५ लाख रुपैयाँको लागतमा २०७९ साल मंसिर १९ गते सम्पन्न गर्नेगरी गणेश जेभीसँग ठेक्का सम्झौता भएको छ । बागमती प्रदेश सरकारले चालु आर्थिक वर्षमा खर्च गर्ने गरी डेढ करोड रुपैयाँ पुल निर्माणका लागि उपलब्ध गराउने मुख्यमन्त्री पौडेलले बताउनुभयो । उहाँले पुल निर्माणका लागि आगामी वर्षमाको बजेटमा पनि निरन्तरता दिने बताउनुभयो ।
मुख्यमन्त्री पौडेलले संघीयतामा गएपछि ३ वर्षको अविधमा देशमा विकासको लहर आएको बताउनुभएको छ । मनहरी गाउँपालिकामा पनि विगत ३ वर्षमा सडकमात्रै नभएर समग्र क्षेत्रको विकास भएको बताउनुभयो । मुख्यमन्त्री पौडेलले अहिलेको सरकारले जति कुनै पनि सरकारले कम नगरेको दाबी गर्नुभएको छ । उहाँले यसअघिका विभन्न सरकारहरुले विकासका कामको सिन्को नभाँचेको भन्दै अहिलेको सरकारले विकासको लहर ल्याएको बताउनुभयो ।
उहाँले यो सरकारले ५ वर्ष पूरै चलाउन पाएको भए देशमा ठूला–ठूला परिवर्तन देख्न पाइने भन्दै चुनावमा होमिनुपरेको बताउनुभयो । उहाँले प्रधानमन्त्री केपी ओलीले लोकतन्त्रलाई बचाएको बताउनुभयो । प्रतिनिधिसभाको विघटन गरेर विदेशीको हातमा आफ्नो देशको चावी दिन प्रधानमन्त्रीले रोकेको उहाँले बताउनुभयो ।
मुख्यमन्त्री पौडेलले बैशाखमा चुनावमा जान जनतालाई तयार हुन पनि आग्रह गर्नुभयो । यसअघिका सरकारले गरेको काम भए देखाउन भन्दै अहिलेको सरकारले इतिहासमै सबैभन्दा बढी काम गरेको दाबी गर्नुभयो । उहाँले हालका प्रधानमन्त्री केपी ओलिले देशलाई मार्गनिर्देशन दिनुभएको तथा प्रदेश र स्थानीय सरकारहरुलाई पनि काम गर्न अधिकार र कार्यक्षेत्र दिएको बताउनुभयो । प्रदेश सरकार र स्थानीय सरकार आएपछि गाउँगाउँमा विकासका कामहरु देखिन थालेको उहाँको भनाई छ ।
मुख्यमन्त्री पौडेलले ५ वर्षको सरकार अगाडि बढेको देख्न चाहे पनि प्रधानमन्त्री र राष्ट्रपतिलाई नै महाअधियोग लगाउने कार्य भएको हुँदा विदेशीको हातमा देशको चावी दिनबाट रोक्न संसद विघटन गर्नुपरेको बताउनुभयो । संसद विघटनपछिको अवस्थामा पुनः जनतामा जानु नै उपयुक्त हुने देखिएको उहाँको भनाई छ । उहाँले हालको सरकारको विरोध गर्नेहरु विगतमा पटकपटक देशको प्रधानमन्त्री बने पनि विकासका कामहरु केही गर्न नसकेको भन्दै जनताले अब ती नेताहरुको मूल्यांकन गर्नुपर्ने बताउनुभयो ।
