हेटौंडाः बागमती प्रदेशका ६३ हजार जनालाई पहिलो चरणमा कोरोना भाइरसविरुद्धको खोप लगाइने तयारी भएको छ । पहिलो चरणमा फोहोरमैला व्यवस्थापनमा खटिने फोहोर संकलक र चालक, एम्बुलेन्स तथा शवबाहनका चालक/सहचालक, प्रत्यक्ष उपचार सेवा दिने वा खोप व्यवस्थापनमा खटिने स्वास्थ्यकर्मी, खोप केन्द्रमा खटिने सुरक्षाकर्मी, स्वयम्सेवक, शव व्यवस्थापनमा खटिएकाहरु, स्वास्थ्य स्वयम्सेवक, अन्तर्राष्ट्रिय प्रवेश विन्दुमा कार्यरत स्वास्थ्यकर्मी र स्वयम्सेवकलाई खोप दिइने तयारी भएको स्वास्थ्य निर्देशनालय बागमती प्रदेशका निर्देशक रमेश अधिकारीले बताउनुभयो ।
भारत सरकारले नेपाललाई १० लाख डोज कोरोनाविरुद्धको खोप अनुदानमा उपलब्ध गराएसँगै भोलि बुधबारबाट पहिलो चरणमा देशैभर करिब ४ लाख जनालाई खोप लगाउने तयारी भएकोे हो । बागमती प्रदेशका १३ जिल्लाका लागि ३५ केन्द्रबाट कोरोना भाइरसविरुद्धको खोप लगाइने तय भएको निर्देशक अधिकारीले जानकारी दिनुभयो । खोप लगाउने संख्याको आधारमा केन्द्रहरु तय भएका छन् । उहाँले भन्नुभयो, ‘सबैभन्दा धेरै काठमाडौं जिल्लामा १२ वटा केन्द्रबाट खोप लगाइने भएको छ । ४० हजार जनालाई काठमाडौंको १२ स्थानबाट खोप लगाउने तयारी भएको हो । सबैभन्दा कम बागमती प्रदेशको रसुवा जिल्लाको ५ सय १० जनालाई खोप लगाइने तयारी भएको छ । भोलि बुधबारबाट खोप लगाउन सुरु हुनेछ । पहिलो पटक लगाएको ४ हप्तापछि पुनः दोस्रो चरणको खोप लगाउनुपर्ने निर्देशक अधिकारीले बताउनुभयो ।
बामगती प्रदेशको चितवन, ललितपुरमा ३–३ वटा केन्द्रबाट खोप लगाइने भएको छ । यस्तै, सिन्धुली, धादिङ, काभ्रे, नुवाकोट, रामेछाप, भक्तपुर, दोलखा जिल्लामा २–२ वटा केन्द्रबाट खोप लगाइनेछ भने मकवानपुर र रसुवा जिल्लामा एक–एक वटा केन्द्रबाट कोभिडविरुद्धको खोप लगाइने निर्देशक अधिकारीले बताउनुभयो । उहाँले खोपको असर देखापरेमा तुरुन्त चिकित्सकको टोली उपलब्ध हुने स्थानमा मात्र खोप केन्द्र स्थापना गरिएको जानकारी दिनुभयो ।
बागमती प्रदेश आपूर्ति व्यवस्थापन केन्द्रको हेटौंडास्थित कार्यालयमा ७६ हजार डोज कोरोनाको खोप आइसकेको छ । बागमती प्रदेशको ३ जिल्ला तथा प्रदेश नम्बर २ का ६ जिल्लाको लागि कोरोनाविरुद्धको खोप आएको प्रदेश आपूर्ति व्यवस्थापन केन्द्रका प्रमुख बसन्त अधिकारीले बताउनुभयो । उहाँले बागमती प्रदेशको सिन्धुली, चितवन र मकवानपुरलाई प्रदेश आपूर्ति केन्द्रबाट खोप पठाइने र तराईका ६ जिल्लामा भण्डारणको व्यवस्था नहुँदा त्यसका लागि पनि खोप हेटौंडामा राखिएको बताउनुभयो ।
बागमती प्रदेशका अन्य १० जिल्लाको लागि भने केन्द्रबाटै खोप जिल्ला–जिल्लामा पुर्याइएको अधिकारीले जानकारी गराउनुभयो । उहाँले खोप सुरक्षित तरिकाले राख्न नसकेमा बिग्रने भन्दै २ देखि ८ डिग्री सेल्सियस तापक्रममा भण्डारण गरिएको बताउनुभयो । तापक्रम बढी भएपनि खोप बिग्रने तथा तापक्रम कम हुँदा पनि खोप बिग्रन सक्ने भएकाले यसमा विशेष ध्यान दिइएको उहाँले बताउनुभयो ।
