हेटौंडाः मकवानपुर जिल्ला एथ्लेटिक्स संघले दुईजना पत्रकारलाई सम्मान गरेको छ । शनिबार वनभोज कार्यक्रमको समेत आयोजना गरेर एथ्लेटिक्स संघले समृद्ध समाज दैनिकका सम्पादक सुरेश श्रेष्ठ र प्रदेश दैनिकका संवाददाता राजन कटुवाललाई सम्मान गरेको हो । पत्रकारिताका माध्यमबाट एथ्लेटिक्स खेलको विकासमा सहयोग गरेको भन्दै संघले सम्मानपत्र प्रदान गरेको छ ।
मकवानपुर जिल्ला एथ्लेटिक्स संघका अध्यक्ष प्रभाकर पाण्डेको अध्यक्षता तथा बागमती प्रदेश खेलकुद विकास परिषद्का सदस्य माधव तिमल्सिनाको प्रमुख आतिथ्यमा वनभोज तथा सम्मान कार्यक्रम भएको हो । कार्यक्रममा मकवानपुर जिल्ला खेलकुद विकास समितिका अध्यक्ष सानु लामा, मकवानपुर बडि बिल्डिङ संघका अध्यक्ष सुनिल लोप्चन, मकवानपुर जिल्ला खेलकुद विकास समितिका कार्यालय प्रमुख खुशराज दाहालको पनि उपस्थिति रहेको थियो ।
कार्यक्रममा सहभागीले एथ्लेटिक्स खेल सबै खेलको पनि आधार खेलको रुपमा रहने भएकोले एथ्लेटिक्स खेललाई प्राथमिकतामा राख्नुपर्नेमा जोड दिएका थिए । एथ्लेटिक्स खेलका लागि पूर्वाधार नभएको भन्दै मकवानपुर एथ्लेटिक्स संघका अध्यक्ष प्रभाकर पाण्डेले पूर्वाधार निर्माणमा संघले सरोकारवाला निकायमा पहल गरिरहेको बताउनुभयो । प्रदेश सरकारको लगानीमा हेटौंडा–६, गौरिटारस्थित रंगशालामा एथ्लेटिक्स ट्र्याक निर्माण भइरहेको छ । एथ्लेटिक्स संघले हरेक वर्ष ५ किलोमिटर दौड आयोजना गर्नुका साथै विद्यालयस्तरीय प्रतियोगिता आयोजनाका लागि मकवानपुर जिल्ला खेलकुद विकास समितिलाई सहयोग गर्दै आएको छ ।
