हेटौंडाः ग्रामीण महिला सेवा केन्द्रले प्लान इन्टनेशनलसँगको सहकार्यमा सञ्चालन गरेको बालिका शक्ति परियोजनाको सामाजिक परीक्षण कार्य शुक्रबार गरेको छ । ग्रामीण महिला सेवा केन्द्रकी अध्यक्ष उर्मिला कार्कीको अध्यक्षता तथा जिल्ला समन्वय समिति (जिसस) मकवानपुरका प्रमुख रघुनाथ खुलालको प्रमुख आतिथ्यमा सामाजिक परीक्षण कार्यक्रम भएको हो ।
बालिका शक्ति परियोजनाका संयोजक कमल फूँयालले परियोजनाका बारेमा प्रस्तुती गर्नुभएको थियो । सन् २०२० मा गरेको एक वर्षको कार्यका बारेमा जानकारी गराउनुहुँदै परियोजना संयोजक फूँयालले बालिका शक्ति परियोजनाबाट लाभान्वित बालिकाहरुले बालविवाह रोक्न सफल भएको, उनीहरुको व्यक्तित्व र नेतृत्व क्षमता विकास भएको बताउनुभयो । कार्यक्रममा जिल्ला समन्वय समिति मकवानपुरका प्रमुख रघुनाथ खुलालले पारदर्शिताका लागि सामाजिक परीक्षण महत्वपूर्ण भएको र ग्रामीण महिला सेवा केन्द्रको कार्य सराहनीय भएको बताउनुभयो ।
परियोजनाको सामाजिक परीक्षणको अवसरमा संस्थाकी अध्यक्ष उर्मिला कार्कीले महिला सशक्तीकरणका लागि दुई दशकदेखि क्रियाशील ग्रामीण महिला सेवा केन्द्रका अगुवाहरु अहिले स्थानीय तहका उपप्रमुखदेखि कार्यपालिका सदस्य र वडा सदस्यको रुपमा निर्वाचित भएर जनताको सेवा गरिरहेको बताउनुभयो । परियोजनाकी लेखा प्रमुख शर्मिला मगरले एक वर्षको अवधिमा एक करोड तीन लाख ४६ हजार रुपैयाँ खर्च भएको जानकारी दिनुभयो । कार्यक्रममा भीमफेदी गाउँपालिकाकी उपाध्यक्ष पार्वती राना, बागमती गाउँपालिकाकी उपाध्यक्ष धनमाया स्याङ्तानको पनि उपस्थिति रहेको थियो ।
