हेटौंडाः पूर्वपश्चिम राजमार्गअन्तर्गत हेटौंडा–१९, दाडिमटारमा शनिबार दिउँसो १ बजेको समयमा बस दुर्घटना हुँदा एकजनाको मृत्यु भएको छ । हेटौंडाबाट नारायणगढतर्फ जाँदै गरेको ना ५ ख ४६०९ नम्बरको मिनीबस अनियन्त्रित भई दुर्घटना हुँदा बसमा सवार लमजुङ जिल्लाको सुन्दरबजार नगरपालिका–८ का हरि गौलीको मृत्यु भएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ ।
तीव्र गति भएकोले अनियन्त्रित भई दुर्घटना भएको प्रहरीको प्रारम्भिक अनुमान छ । दुर्घटनामा परी गम्भीर घाइते भएका हरि गौलीलाई उपचारका लागि हेटौंडास्थित चुरेहिल हस्पिटलमा लैजाँदा चिकित्सकले मृत घोषित गरेको प्रहरीले जनाएको छ । दुर्घटनामा परी ९ जना घाइते भएको र उनीहरुको चुरेहिल हस्पिटलमै उपचार भइरहेको प्रहरीले जनाएको छ ।
