हेटौंडाः मकवानपुरको मनहरी गाउँपालिकामा सुरु भएको तेस्रो अध्यक्ष कप फुटबल प्रतियोगितामा आज मनहरी–२ र मनहरी–९ भिड्ने भएका छन् ।
शनिबारबाट सुरु भएको तेस्रो अध्यक्ष कपमा पहिलो दिन ७ नम्बर वडाले ६ नम्बर वडालाई २–० गोलअन्तरले पराजित गरेको थियो । प्रतियोगितामा गाउँपालिकाका ९ वटै वडाले सहभागिता जनाएका छन् ।
प्रतियोगिताको उपाधि विजेताले नगद एक लाख रुपैयाँसहित शिल्ड, मेडल प्राप्त गर्नेछ भने उपविजेता हुने टिमले ५० हजार रुपैयाँ नगदसहित शिल्ड, मेडल प्राप्त गर्नेछ । प्रतियोगितामा विधागत उत्कृष्ट खेलाडीले नगद ५ हजार प्राप्त गर्ने मनहरी गाउँपालिका खेलकुद विकास समितिका अध्यक्ष नविन सुवेदीले जानकारी दिनुभयो ।
