हेटौंडाः जुवा खालबाट १४ जनालाई मकवानपुर प्रहरीले पक्राउ गरेको छ । हेटौंडा–४, पारिजातपथस्थित दिलबहादुर मोक्तानको घरमा कौडा खेलिरहेको अवस्थामा प्रहरीले बिहीबार राती साढे ९ बजे छापा मार्दा तीन लाख ३२ हजार आठ सय ९२ रुपैयाँसहित १४ जनालाई नियन्त्रणमा लिएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ ।
प्रहरीले कौडाको खालबाट ३१ थान कौडा बरामद गरेको छ । प्रहरीले सुवास बर्तौला, प्रतिमान रुम्बा, सुरज कुमार स्याङ्तान, लालबहादुर सुनार, लालबहादुर बलामी, सरोज घलान, राजु तामाङ, सन्तोष बिश्वकर्मा, कुमार लामा, गौतम लो, दिपक गिरि, रामेश्वर दास, श्याम सुन्दर बर्मा र कृष्ण लामालाई नियन्त्रणमा लिएको जनाएको छ । घरधनी दिलबहादुर मोक्तान भने फरार रहेको प्रहरी प्रवक्ता ईन्द्रबहादुर रानाले जानकारी दिनुभएको छ ।
