हेटौंडाः पूर्वसांसद वीरबहादुर लामाको निधनमा शोक व्यक्त गर्दै मकवानपुरको ईन्द्रसरोवर गाउँपालिकाले बुधबार सार्वजनिक विदाको घोषणा गरेको छ । गाउँपालिकाका अध्यक्ष जीवन लामाले एक विज्ञप्ति जारी गर्नुहुँदै ईन्द्रसरोवर गाउँपालिकाको फाखेलका स्थायीवासी लामाको निधनप्रति दुख व्यक्त गर्दै सार्वजनिक बिदा दिने निर्णय गरिएको जानकारी गराउनुभएको छ ।
तत्कालिन नेकपा एमालेका केन्द्रीय नेता, जिविस मकवानपुरका पूर्वसभापति एवम् पूर्व सांसद लामा मिर्गौलामा समस्या भएपछि उपचाररत लामाको आइतबार बिहान ललितपुरको पाटन अस्पतालमा निधन भएको थियो । मंगलबार काठमाडौंको स्वयम्भुमा नेकपाका वरिष्ठ नेता माधव कुमार नेपालको उपस्थितिमा श्रद्धाञ्जली सभाको आयोजना गरिएको थियो । नेकपाका वरिष्ठ नेता नेपालले लामाको पार्थिव शरीरमा पार्टीको झण्डा ओढाएर सम्मान व्यक्त गर्नुभएको थियो ।
