मेसिनको प्रयोग गरेर धान काट्नु हुँदै मकवानपुरगढी गाउँपालिकाका अध्यक्ष विदुर हुमागाई ।

हेटौंडाः मकवानपुर जिल्लाको मकवानपुरगढी गाउँपालिकाले कृषि सहकारी संस्थालाई ५० प्रतिशत अनुदानमा धान काट्ने मेसिन हस्तान्तरण गरेको छ । प्रमुख बालीको रुपमा रहेको धानबाली भित्र्याउने समय सुरु भएसँगै मंगलबार एक कार्यक्रमका बीच गाउँपालिकाका दुईवटा कृषि सहकारीलाई धान काट्ने मेसिन हस्तान्तरण गरिएको हो ।

मकवानपुरगढी गाउँपालिकाको चालु आर्थिक वर्ष २०७७/७८ को स्वीकृत कृषि विकास कार्यक्रमतर्फ कृषि यान्त्रीकरण प्रवद्र्धन गर्ने क्रममा अनुदानमा मेसिन वितरण गरिएको मकवानपुरगढी गाउँपालिकाका कृषि प्राविधिक चन्द्रकान्त चौधरीले जानकारी दिनुभएको छ । गाउँपालिकाका अध्यक्ष बिदुर हुमागाईले कृषि सहकारीलाई मेसिन हस्तान्तरण गर्नुका साथै मेसिन चलाएर धान काट्ने कार्यको पनि आरम्भ गर्नुभएको छ । गढी गाउँपालिकामा पहिलोपटक मेसिन प्रयोग गरेर धान काट्न सुरु गरिएको कृषि प्राविधिक चन्द्रकान्त चौधरीले बताउनुभएको छ । गाउँपालिकाले मकवानपुरगढी–३ स्थित श्रमिक साना किसान कृषि सहकारी संस्था लिमिटेड र मकवानपुरगढी–६ स्थित एकीकृत शत्रुजीव व्यवस्थापन (आईपिएम) कृषक सहकारी संस्था लिमिटेडलाई धान काट्ने मेसिन हस्तान्तरण गरेको हो ।

सहकारीकी व्यवस्थापक गीता लम्साललाई धान काट्ने मेसिनको चाबी हस्तान्तरण गर्नुहुँदै गाउँपालिका अध्यक्ष विदुर हुमागाई ।

श्रमिक साना किसान कृषि सहकारी संस्था लिमिटेडकी प्रबन्धक गीता लम्साल र एकीकृत शत्रुजीव व्यवस्थापन (आईपिएम) कृषक सहकारी संस्था लिमिटेडका उपाध्यक्ष बद्रिप्रसाद दाहाललाई धान काट्ने मेसिन हस्तान्तरण गरिएको हो । मेसिन हस्तान्तरण कार्यक्रममा मकवानपुरगढी गाउँपालिकाको ५ नम्बर वडाध्यक्ष जीतबहादुर घिमिरे, ६ नम्बर वडाध्यक्ष टिकाप्रसाद दाहाल, वडा सदस्यहरु, सहकारीका प्रतिनिधी र कृषकहरुको सहभागिता रहेको थियो ।