हेटौँडाः सोमबारदेखि हेटौँडा–२ स्थित मकवानपुर बहुमुखी क्याम्पसको ४६ औँ वार्षिक उत्सव सुरु भएको छ । सोमबार स्वतन्त्र विद्यार्थी युनियनका सभापति प्रसिद्ध रेग्मीको सभाध्यक्षता र क्याम्पस सञ्चालक समितिका अध्यक्ष अनन्त पौडेलको प्रमुख आतिथ्यमा उद्घाटन समारोह भएको थियो ।
वार्षिक उत्सवको अवसरमा क्याम्पसमा रहेको स्वतन्त्र विद्यार्थी युनियनले सप्ताहव्यापी विभिन्न खेलहरु आयोजना गर्ने सभापति रेग्मीले बताउनुभयो । सोमबारदेखि मंगलबारसम्म क्याम्पस प्राङ्गणमा भलिबल प्रतियोगिता भएको थियो । मंगलबार गायन र नृत्य प्रतियोगिताको अडिसन र चेस प्रतियोगिता भएको छ । गायन र नृत्यको अडिसनमा छनोट भएकाहरुको माघ १९ गते प्रतिस्पर्धा हुने सभापति रेग्मीले बताउनुभयो ।
आज बुधबार फुटबल र हाजिरीजवाफ प्रतियोगिता हुँदैछ । बिहीबार क्रिकेट, बास्केटबल र कविता प्रतियोगिता हुनेछ । यस्तै, आइतबार डोरी तान्ने, ईफुटबल र ५ किलोमिटर म्याराथन दौड प्रतियोगिता हुनेछ ।
माघ १९ गते क्याम्पस स्थापना दिवसको दिन हुने समापन कार्यक्रममा प्रतियोगिताका विजेताहरुलाई पुरस्कार वितरण गरिनेछ । विजेताहरुले ट्रफी, मेडल र प्रमाणपत्र प्राप्त गर्नेछन् । विजेटा टोलीले १ वर्षको लागि क्याम्पसको आधिकारिक टिमको मान्यता पाउने सभापति रेग्मीले बताउनुभयो । प्रतियोगितामा ५ लाख रुपैयाँ खर्च हुने अनुमान गरिएको छ । वार्षिक उत्सवको लागि क्याम्पसको वार्षिक बजेटमा रकम छुट्याइएको छ ।
