हेटौँडा : बागमती प्रदेशसभामा नेकपा एमालेको प्रमुख सचेतकमा एकालाल श्रेष्ठ नियुक्त हुनुभएको छ । नेकपा एमाले संसदीय दलको नेता जगन्नाथ थपलियाले श्रेष्ठलाई प्रमुख सचेतकको जिम्मेवारी प्रदान गर्नुभएको हो ।
प्रदेशसभा सचिवालय परिसरस्थित नेकपा एमाले संसदीय दलको कार्यालयमा बिहीबार नेता थपलियाले श्रेष्ठलाई प्रमुख सचेतकको नियुक्तिपत्र प्रदान गर्नुभएको छ । नेता थपलियाले एमाले संसदीय दलको विधान २०७७ को दफा १३ बमोजिम प्रमुख सचेतकको जिम्मेवारी प्रदान गर्नुभएको हो । प्रदेशको खानेपानी उर्जा तथा सिंचाई मन्त्री समेत भइसक्नु भएका श्रेष्ठ मकवानपुर क्षेत्र नम्बर १ (२) बाट प्रदेशसभा सदस्य निर्वाचित हुनुभएको हो ।
बागमती प्रदेशसभामा यसअघिका एमाले संसदीय दलको प्रमुख सचेतक मधुसुदन पौडेल प्रदेशको कृषि तथा पशुपन्छी विकास मन्त्री नियुक्त हुनुभएपछि प्रमुख सचेतकको जिम्मेवारी श्रेष्ठलाई प्रदान गरिएको हो ।
