हेटौँडा : बागमती प्रदेश सरकारको स्वास्थ्य मन्त्रालय मातहतको स्वास्थ्य निर्देशनालयले २१औं विश्व रक्तदाता दिवसको अवसरमा रक्तदातालाई सम्मान गरेको छ । शनिबार बिहान हेटौँडा–१०, बुद्धचोकमा एक समारोहका बीच बागमती प्रदेशका स्वास्थ्य मन्त्री किरण थापाले उत्कृष्ट रक्तदाताको रुपमा हेटौँडा–४ की मौसमी श्रेष्ठ र अनिल खड्गेलाई सम्मान गरेको छ । यस्तै दूर्लभ रक्तसमूहका रक्तदाता हेटौँडा–५ का लालकिरण ढुंगेललाई पनि सम्मान गरेको छ ।
नेपाल रेडक्रस सोसाइटी मकवानपुरसँगको सहकार्यमा आयोजित कार्यक्रममा चालु आर्थिक वर्षमा रक्तदान कार्यक्रम आयोजना गर्ने ९० वटा संघ, संस्थालाई पनि प्रशंसा पत्र प्रदान गरिएको छ । चालु आर्थिक वर्षमा सबैभन्दा बढी रक्तदान गर्ने हेटौँडा अटोमोवाइल एसोसिएसन (१०२ जना), आन्तरिक राजश्व कार्यालय हेटौँडा (५३ जना) र अनेरास्ववियु मकवानपुर बहुमुखी क्याम्पस इकाई (५१ जना) लाई सम्मान समेत गरेको छ ।
जनस्वास्थ्य कार्यालय मकवानपुरका प्रमुख कृष्ण बहादुर मिजारको अध्यक्षतामा रक्तदान कार्यक्रम समेत भएको थियो । ३२ जनाले रक्तदान गरेको रक्तसञ्चार केन्द्र हेटौँडाका प्रमुख टंक दाहालले जानकारी दिनुभयो । अहिले मकवानपुरमा रगतको माग र संकलनको कार्य सन्तुलित रहेको जानकारी गराउनुहुँदै अब रगतको माग बढ्ने समय आएको बताउनुभयो । कार्यक्रममा नेपाल रेडक्रस सोसाइटी मकवानपुरकी मन्त्री सुमित्रा काफ्ले, स्वयंसेवी रक्तदाता समाज मकवानपुरका अध्यक्ष पूर्णप्रसाद अर्यालको पनि आतिथ्य रहेको थियो ।
