हेटौँडा : हेटौँडा हुँदै काठमाडौं जाँदै गरेको भारतीय नम्बरको एम्बुलेन्सबाट प्रहरीले ठूलो परिणाममा अवैध लागुऔषध बरामद गरेको छ । शुक्रबार राती १ बजेर ५५ मिनेटको समयमा कान्तिलोकपथको भट्टेडाँडास्थित प्रहरी चौकी चेकपोष्टमा खटिएको प्रहरी टोलीले भारतीय एम्बुलेन्समा ठूलो परिमाणमा अवैध लागुऔषध ट्रामाडोल क्याप्सुल बरामद गरेको हो ।
एक पत्तामा १० क्याप्सुल भएको ट्रामाडोल हाइड्रोक्लोराइड क्याप्सुल आइपी ट्रामाडोल लेखिएको ट्रामाडोल क्याप्सुल ५ हजार ४ सय पत्ता, एक पत्तामा १० क्याप्सुल भएको ट्रामाडोल हाइड्रोक्लोराइड क्याप्सुल आइपी ५० एमजि ट्रामन लेखिएको ट्रामाडोल क्याप्सुल ४ हजार ८ पत्ता गरी जम्मा ९ हजार ४ सय ८ पत्ता बरामद भएको प्रहरीले जनाएको छ । प्रहरीले बिआर ०५ पिए ०४२१ नम्बरको भारतीय एम्बुलेन्स नियन्त्रणमा लिएको पत्रकार सम्मेलनका क्रममा प्रहरी उपरीक्षक नरहरि रेग्मीले बताए ।
पक्राउ पर्नेमा भारत बिहार राज्यको पूर्वी चमपारण, मोतिहारी जिल्लाका २० वर्षीय समीर आलम, ३३ वर्षीय मोहम्मद मुन्ना अन्सारी, ४५ वर्षिया नोर्जान खातुन, २२ वर्षीय मोहम्मद उमर सिद्धिकी (एम्बुलेन्स चालक) रहेका छन् । एम्बुलेन्सबाट बाहिर निस्किएर भाग्ने प्रयास गरेकाले चालक सिद्धिकीलाई तत्काल नियन्त्रणमा लिई एम्बुलेन्सको तलासी लिँदा लागुऔषध भेटिएको प्रहरीले बताएको छ । एम्बुलेन्समा एक बालक र एक बालिकासहित ६ जना थिए ।
