हेटौंडाः राष्ट्रिय प्रजातन्त्र पार्टी (राप्रपा)का केन्द्रीय अध्यक्ष राजेन्द्र लिङ्देनले पार्टीको मकवानपुर जिल्ला अधिवेशन गर्न निर्देशन दिनुभएको छ । शनिबार बाराको जीतपुर सिमरा उपमहानगरपालिकाको अधिवेशन उद्घाटन गर्न जाने क्रममा हेटौंडा आउनु भएका अध्यक्ष लिङ्देनले कार्यकर्ता भेटघाट तथा पत्रकार सम्मेलनमा जिल्ला अधिवेशन गर्न निर्देशन दिनुभएको जिल्ला युवा संयोजक किशोर खत्रीले जानकारी दिनुभयो ।
अध्यक्ष लिङ्देनले नेता, कार्यकर्ताहरुलाई संगठन निर्माणमा ध्यान दिन पनि निर्देशन दिनुभएको संयोजक खत्रीले बताउनुभयो । कार्यक्रममा राप्रपा कार्यकर्ताले नेपाली कांग्रेससँगको गठबन्धनको कुरा उठाएपछि अध्यक्ष लिङ्देनले कांग्रेससँग गठबन्धन असम्भव भएको बताउनुभयो ।
कार्यक्रम राप्रपा मकवानपुरका अध्यक्ष शिवराम थापाको सभाध्यक्षतामा भएको थियो । कार्यक्रममा मकवानपुर क्षेत्र नम्बर दुईका सांसद दीपकबहादुर सिंह र पार्टीका केन्द्रीय सदस्यहरु खुस्बु ओली, सुष्मा मिश्र, रामबहादुर थोकर र रामहरि न्यौपानेको उपस्थिति रहेको थियो ।
