हेटौंडाः जिल्ला प्रहरी कार्यालय बाराका प्रहरीले ३२ लाख रुपैयाँ बराबरको अवैध सामान बरामद गरेको छ । प्रहरी टोलीले विभिन्न समयमा गाडीहरुको सुरक्षाजाँच गर्दा अवैध सामान बरामद गरेको हो । इलाका प्रहरी कार्यालय अम्लेखगञ्ज र प्रहरी चौकी पथलैयाबाट खटिएको प्रहरी टोलीले ६१ लाख १३ हजार ८ सय ५५ रुपैयाँ बराबर गरेको हो । प्रहरीले बरामद गरेको अवैध सामान राजश्व अनुसन्धान कार्यालय पथलैया पठाएको छ ।
आइतबार ११ बजेर २० मिनेटको समयमा बारा जिल्लाको जीतपुर–सिमरा उपमहानगरपालिका–२१, अमलेखगञ्जचोकस्थित प्रहरी वरिष्ठ नायव निरीक्षक टेक बहादुर कार्कीको कमाण्डमा खटिएको प्रहरी टोलीले जीतपुरबाट काठमाडौँतर्फ जाँदै गरेको प्र ३ ०१–००५ ख ९४२२ नम्बरको ट्रकमा लोड गरेको ३ लाख ३६ हजार रुपैयाँको ३५ बोरा चिनी, ६ बोरा आलु, ५ बोरा प्याज नियन्त्रणमा लिएको हो ।
यस्तै सोमबार बिहान ३ बजेर ३० मिनेटको समयमा जीतपुर–सिमरा उपमहानगरपालिका–७, जीतपुरचोकमा प्रहरी नायव निरीक्षक. मोहनारायण रायको कमाण्डमा खटिएको प्रहरी टोलीले वीरगंजबाट पथलैयातर्फ जाँदै गरेको ना ८ ख ८२८६ नम्बरको ट्रकमा लोड गरेको ३१ लाख ७९ हजार रुपैयाँ बराबरको त्रिपाल, मोविललगायतका सामानहरु नियन्त्रणमा लिएको छ भने सोमबार नै ७ बजेर १० मिनेटको समयमा जीतपुर–सिमरा उपमहानगरपालिका–१ पथलैयाचोकमा प्रहरी नायव निरीक्षक रोशन अधिकारीको कमाण्डमा खटिएको प्रहरी टोलीले वीरगंजबाट काठमाडौंतर्फ जाँदै गरेको प्र ०२ ०३–००१ ख ३६८९ नम्बरको ट्रकमा लोड गरेको २५ लाख ९८ हजार रुपैयाँ बराबरको खाद्यान्न सामग्री वरामद गरेको थियो ।
