हेटौँडाः लायन्स क्लब इन्टरनेशनल डिष्ट्रिक्ट ३२५ एस नेपाल अन्तर्गत एरिया २ भित्रका लायन्स तथा लियो क्लबका नयाँ पदाधिकारीहरुको आज शनिबार संयुक्त पदस्थापन हुने भएको छ । पदस्थापन समारोहको पूर्वसन्ध्यामा शुक्रबार पत्रकार सम्मेलनको आयोजना गर्दै पदस्थापन समारोहका संयोजक विजय कार्कीले कार्यक्रमबारे जानकारी गराउनुभयो ।
एरिया–२ अन्तर्गत मकवानपुरभित्रका क्लबहरुको लायन वर्ष २०२४/२५ का लागि पदस्थापना हुन लागेको हो । यसअघि एरिया–१ अन्तर्गत काठमाडौं र एरिया–३ अन्तर्गत पर्सा र बारामा पदस्थापना भइसकेको संयोजक कार्कीले बताउनुभयो । लायन्सले दृष्टि वातावरण, भोकमरी, बाल क्यान्सर, युवा, शिक्षा, महिला र बालबालिकाको क्षेत्रमा काम गरिरहेको उहाँले बताउनुभयो ।
यस्तै लायन्स एरिया–२ का चिफ किसन घिसिङले शनिबार मकवानपुरभित्रका ३२ वटा लाइन्स र १२ वटा लियो क्लबका पदाधिकारीको पदस्थापना हुने बताउनुभयो । शनिबार बागमती प्रदेशका प्रमुख दीपक प्रसाद देवकोटाको प्रमुख आतिथ्यमा पदस्थापना कार्यक्रम हुने उहाँले बताउनुभयो । कार्यक्रममा ३ लाख खर्च हुने अनुमान गरिएको उहाँले बताउनुभयो । पत्रकार सम्मेलनमा डिष्ट्रिक गर्भनर टासी डोल्मा तुम्बाहाम्फे र पूर्व गर्भनर शम्भु नकर्मी लगायतको उपस्थिति रहेको थियो ।
