हेटौंडाः नगरस्तरीय शैक्षिक समन्वय समिति हेटौंडाले माध्यमिक शिक्षा परीक्षा (एसईई) मा उत्कृष्ट नतिजा ल्याउने विद्यार्थी तथा विद्यालयलाई सम्मान गरेको छ । समितिले शनिबार २०८० सालको एसईई परीक्षामा उत्कृष्ट नतिजा ल्याउन सफल विद्यार्थी तथा विद्यालयलाई सम्मान गरेको हो ।
विद्यार्थीहरुको हौसला बढाउने उद्देश्यले ३ दशमलब ६१ देखि अधिक जिपीए अर्थात् ए प्लस ल्याउने विद्यार्थीलाई शनिबार हेटौंडा उपमहानगरपालिकाको सभाहलमा एक कार्यक्रम बीच सम्मान गरेको हो । हेटौंडा उपमहानगरपालिका भित्रको ८ वटा सामुदायिक विद्यालयबाट ३ दशमलब ६१ देखि ४ जिपीएसम्म ल्याउने ६३ जना विद्यार्थीहरुलाई सम्मानपत्र प्रदान गरिएको छ ।
हेटौंडा–४ स्थित आधुनिक राष्ट्रिय माध्यमिक विद्यालयबाट ३ दशमलव ६१ देखि ३ दशमलब ८७ जिपीएसम्म ल्याउने २७ जना र भूटनदेवी माध्यमिक विद्यालयबाट ६ दशमलब ६१ देखि ३ दशलब ८२ सम्म जिपीए ल्याउने १५ जना विद्यार्थीलाई सम्मान गरिएको छ । हेटौंडा–९ स्थित प्रगति माध्यमिक विद्यालयबाट ३ दशमलब ६६ देखि ३ दशमलब ८४ जिपीए ल्याउने ७ जना र हेटौंडा–१६ स्थित जनप्रिय माध्यमिक विद्यालयबाट ३ दशमलब ६५ देखि ३ दशमलब ८९ जिपीए ल्याउने ३ जना विद्यार्थीलाई सम्मान गरिएको छ ।
यस्तै, हेटौंडा–२ स्थित सिद्धार्थ माध्यमिक विद्यालयबाट ३ दशमलब ६४ देखि ३ दशमलब ७७ सम्म जिपीए ल्याउने ४ जना र हेटौंडा–३ स्थित महेन्द्रकिरण माध्यमिक विद्यालयबाट ३ दशमलब ६६ जिपीए ल्याउने १ जना विद्यार्थी सम्मानित भएका छन् । हेटौंडा–५, पिप्लेस्थित बालज्योति माध्यमिक विद्यालयबाट ३ दशमलब ६२ देखि ३ दशमलब ८७ जिपीए ल्याउने ५ जना र हेटौंडा–६ स्थित वंशगोपाल माध्यमिक विद्यालयबाट ३ दशमलब ८४ जिपीए ल्याउने एक जना विद्यार्थीलाई सम्मान गरिएको हो ।
३ दशमलब ६१ भन्दा बढी जिपीए ल्याएर विद्यार्थी उत्तीर्ण गराउने विद्यालयहरुलाई पनि सम्मान गरिएको छ । सम्मानपत्र पाउने विद्यालयमा आधुनिक, भूटनदेवी, प्रगति, सिद्धार्थ, जनप्रिय, बालज्योति, वंशगोपाल र महेन्द्रकिरण मावि छन् ।
नगरस्तरीय शैक्षिक समन्वय समितिका अध्यक्ष भोगेन्द्र लुईंटेलको सभाध्यक्ष तथा हेटौंडा उपमहानगरपालिकाकी प्रमुख मीनाकुमारी लामाको प्रमुख आतिथ्यमा सम्मान कार्यक्रम भएको हो । सम्मान कार्यक्रमलाई सम्बोधन गर्नुहुँदै नगर प्रमुख लामाले आफूले शिक्षा प्रदान गरेको विद्यार्थीहरु कस्तो स्तरमा पुगे भन्ने मूल्याङ्कन गर्नुपर्ने बताउनुभयो । शिक्षकहरुले विद्यार्थीहरुलाई पढाएको समयमा आफूमा भएको कमी र कमजोरीलाई स्वीकार्न सक्नुपर्ने उहाँले बताउनुभयो । विद्यार्थीहरु परीक्षामा पास भए पनि आफ्नो गुणस्तर विकास भएको छ कि छैन भन्ने कुरा बुझ्नुपर्ने उहाँको भनाइ छ ।
हेटौंडा उपमहानगरपालिका वडा नम्बर १६ का वडा अध्यक्ष रामकृष्ण कोइरालाले सबैले राम्रो प्रतिक्रिया देखाएमा सामुदायिक विद्यालयलाई पनि उत्कृष्ट बनाउन सक्ने धारणा राख्नुभयो । शैक्षिक समन्वय समितिले गर्ने विभिन्न प्रकारका कामहरुमा आफूले सक्ने साथ र सहयोग गर्ने विश्वास दिलाउनुभयो ।
नेपाल शिक्षक संघका अध्यक्ष गणेश हुमागाईंले हेटौंडामा सामुदायिक विद्यालयको शैक्षिक गुणस्तर माथिल्लो स्तरसम्म पु¥याउन सबैले जोड दिनुपर्ने बताउनुभयो । सबैले सामुदायिक विद्यालयलाई संयोजन गरेर अगाडि बढ्नुपर्ने उहाँले बताउनुभयो । शैक्षिक क्षेत्रको विकास गर्ने कार्यहरुमा हेटौंडा उपमहानगरपालिकाले प्राथमिकता दिनुपर्ने उहाँले बताउनुभयो । हेटौंडाको सामुदायिक विद्यालयका विद्यार्थीहरुले पनि राम्रो वातावरण पाएका कारणले उत्कृष्ट नतिजा ल्याएर सम्मानित भएको हुमागाईंको भनाइ छ ।
समन्वय समितिका अध्यक्ष लुईंटेलले सामुदायिक विद्यायल उत्कृष्ट छैन भन्ने मानिसहरुको मानसिकतामा बसेका कारणले सबैलाई सन्देश दिन सम्मान कार्यक्रम आयोजना गरेको बताउनुभयो । सामुदायिक विद्यालयलाई पनि सबैले शैक्षिक गन्त्वयको रुपमा लिन सकिने उहाँले प्रष्ट पार्नुभयो । सबै शिक्षकहरु एकीकृत भएर अगाडि बढेमा सामुदायिक विद्यालयले फड्को मार्ने विश्वास उहाँले दिलाउनुभयो ।
सामुदायिक विद्यालयलाई अगाडि बढाउन शिक्षक र अभिभावकको राम्रो सहकार्य हुनुपर्नेमा उहाँले जोड दिनुभयो । कमजोर विद्यार्थीहरुलाई पनि शिक्षकले विशेष प्राथमिकतामा राख्नुपर्ने उहाँको भनाइ छ । कार्यक्रममा विभिन्न विद्यालयका शिक्षक लगायत अभिभावकहरुको उपस्थिति रहेको थियो ।
