हेटौँडाः लागुऔषधसहित एकजना भारतीय नागरिकलाई मकवानपुर प्रहरीले पक्राउ गरेको छ । २ ग्राम १३ मिलिग्राम लागूऔषध खैरो हेरोईन र १ सय ग्राम गाँजासहित बुधबार बिहान ११ बजेर ४० मिनेटको समयमा हेटौँडा–४, नेपालचोकमा डेरा गरी बस्ने भारतीय नागरिकलाई प्रहरीले पक्राउ गरेको हो ।
भारतको पूर्वी चम्पारणका २६ बर्षीय नितेश कुमार बर्णवाललाई विशेष सूचनाको आधारमा प्रहरीले लागुऔषधसहित पक्राउ गरेको हो । प्रहरीले बर्णवालको साथबाट तौल गर्ने डिजिटल मेसिन समेत फेला पारेको जनाएको छ । मकवानपुर जिल्ला अदालतबाट १० दिनको म्याद अनुमति लिई बर्णवाललाई हिरासतमै राखी अनुसन्धान गरिरहेको प्रहरीले जनाएको छ ।
