हेटौंडाः मकवानपुरको मनहरी गाउँपालिकामा प्रथम संस्करणको मिलन–धर्मराज स्मृति फुटबल प्रतियोगिता सुरु भएको छ । सिमपानी युथ क्लबको आयोजनामा बिहीबारबाट सुरु भएको प्रतियोगिताको उद्घाटन गाउँपालिका अध्यक्ष रञ्जन कालाखेतीले गर्नुभएको हो ।
गाउँपालिकाको वडा नम्बर ८ को सिमपानी मैदानमा सुरु भएको प्रतियोगिताको उद्घाटन खेलमा आयोजक सिमपानी युथ क्लबले विजयी सुरुवात गरेको छ । नमुना युवा क्लबलाई १२–० गोलको फराकिलो अन्तरले हराउँदै सिमनापी युथ क्लबले विजयी सुरुवात गरेको हो । सिमपानीको तर्फबाट राज भुसालले ६ गोल, राहुल थाप मगरले ३ गोल, सुमन लामाले २ गोल र दावा गुरुङले १ गोल गरेका हुन् ।
अब सिमपानी क्लबले सेमिफाइन प्रवेशका लागि हेटौंडा फुटबल एकेडेमी र कैलाश आरएमबीचको विजेता टिमसँग प्रतिस्पर्धा गर्नुपर्नेछ । आज शुक्रबार इन्द्रकमल युथ क्लब र एमडीवाइसी बाराबीच प्रतिस्पर्धा हुनेछ । प्रतियोगितामा १२ वटा टिमको सहभागिता रहेको छ । प्रतियागिता आयोजनाका लागि विभिन्न निकायहरुबाट सहयोग प्राप्त हुने बताइएको छ ।
क्लबका अध्यक्ष किरण सुवेदीको सभाध्यक्षमा सुरु भएको प्रतियोगितामा गाउँपालिकाका उपाध्यक्ष सीता पुलामी मगरको विशिष्ट आतिथ्य रहेको थियो । प्रतियोगिताको उपाधि विजेता टिमले एक लाख रुपैयाँ र उपविजेता टिमले पचार हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै, विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ । प्रतियोगिताको फाइनल खेल असार ३१ गते हुनेछ ।
