हेटौंडाः नेकपा एमाले मकवानपुरको १२ औं जिल्ला अधिवेशन आज शुक्रबारबाट सुरु हुने भएको छ । अधिवेशनको उद्घाटनका लागि पार्टीका महासचिव शंकर पोखरेल आउने जिल्ला अध्यक्ष एका लाल श्रेष्ठले जानकारी दिनुभयो ।
अधिवेशन हेटौंडाको रोयल प्यालेसमा हुँदैछ । अधिवेशन भोलि शनिबारसम्म चल्नेछ । अधिवेशनको उद्घाटन पार्टी अध्यक्ष केपी ओलीले गर्ने तय भए पनि विभिन्न समस्याका कारण अध्यक्ष ओली आउन नसक्ने जिल्ला अध्यक्ष श्रेष्ठले बताउनुभयो । अधिवेशनको सम्पूर्ण तयारी पूरा भएको छ । अधिवेशनमा मकवानपुर जिल्लाका १० वटा पालिकाबाट प्रतिनिधि, पर्यवेक्षक र विभिन्न क्षेत्रसंग सम्बन्धित पार्टीको जनवर्गीय संगठनहरुबाट सहभागिता रहनेछन् ।
मकवानपुर जिल्लामा नेकपा एमालेका ११ हजार ६ सय ८४ पार्टी सदस्यबाट अधिवेशनका लागि प्रतिनिधि चयन गरिएको छ । १० वटा पालिकाको १०२ वटा वडा, मजदुर, पेशागत जनसंगठन, ज्येष्ठ कम्युनिष्ट मञ्च, सल्लाहकार परिषद्समेतबाट छानिएर आएका कुल ७६९ प्रतिनिधिहरुले अधिवेशनमा सहभागिता जनाउनेछन् ।
अधिवेशनको बन्द सत्रबाट भावी नेतृत्वसमेत चयन हुने अध्यक्ष श्रेष्ठले बताउनुभयो । अधिवेशनले नेकपा एमालेको मार्गनिर्देशक सिद्धान्त जनताको बहुदलीय जनवादको औचित्यलाई पुष्टि गर्दै सिंगो देशमा सकारात्मक सन्देश प्रवाह गर्ने उहाँको भनाइ छ । अधिवेशनबाट ३ वर्षका लागि १ सय ५ जनाको नयाँ कार्यसमिति चयन हुनेछ । नेकपा एमाले मकवानपुरको अध्यक्षमा रघुनाथ खुलाल, लालबहादुर थापा, इन्द्रमान स्याङ्तान आकांक्षी छन् ।
