हेटौँडाः हेटौंडा–६ स्थित सल्लाघारीमा कुटपिटबाट एक जना गम्भीर घाइते भएका छन् । घाइते हुनेमा हेटौँडा–१६ स्थित शक्तिरोडका २३ वर्षीय साजन राना रहेको बागमती प्रदेश प्रहरी कार्यालय हेटौँडाले जनाएको छ ।
शनिबार राति १० बजेर ३० मिनेटको समयमा अपरिचित ४ जना केटाहरुको समुहले कुटपिट गर्दा राना घाइते भएका हुन् । कुटपिटबाट रानाको टाउको र शरीरको विभिन्न भागमा चोट लागेको जनाएको छ । हेटौँडा–१६ का शंकर पाख्रिनसहितको ६ जनाको समुहले स्कुल नजिकै बसिरहेको अवस्थामा रानालाई फेला पारी उपचारका लागि हेटौँडा अस्पतालमा ल्याइएकोमा थप उपचारका लागि चितवन लगिएकोे छ । कुटपिट गर्नेहरुको खोजी कार्य भइरहेको प्रहरीले जनाएको छ ।
