हेटौंडाः बागमती प्रदेश खेलकुद विकास परिषद्को आयोजनामा भइरहेको अन्तरप्रदेश राष्ट्रिय खेलकुद प्रतियोगिताअन्तर्गत्को हेटौंडामा जारी फुटबल प्रतियोगिताको फाइनलमा कोशी प्रदेश प्रवेश गरेको छ । बुधबार हेटौंडा–६ स्थित गौरीटार रंगशालामा भएको पहिलो सेमिफाइनल खेलमा सुदूरपश्चिम प्रदेशलाई २–० गोल अन्तरले हराउँदै कोशी प्रदेश फाइनल प्रवेश गरेको हो ।
कोशीको जितमा पहिलो हाफको १४ औँ मिनेटमा एक गोल गर्दै निखिल तामाङले पहिलो अग्रता दिलाएका हुन् । पहिलो हाफको १५ औँ मिनेटमा अभिषेक तामाङले निर्णायक गोल गरेका हुन् । खेलको म्यान अफ द म्याच कमल खवास घोषित भएका छन् ।
प्रतियोगिताअन्तर्गत् आज बिहीबार दोस्रो सेमिफाइनल खेलमा बागमती प्रदेश र कर्णाली प्रदेशबीच प्रतिस्पर्धा हुनेछ । प्रतियोगितामा ७ प्रदेशको सहभागिता रहेको थियो । प्रतियोगिताको विजेता र उपविजेता टिमले शिल्ड, मेडल तथा प्रमाणपत्र प्राप्त गर्नेछन् । प्रतियोगिताको फाइनल खेल बैशाख १ गते हुनेछ ।
