हेटौंडाः इस्लाम धर्मावलम्बीहरूको पर्व इद–उल फित्र (इद) आज मनाइँदैछ । इदको अवसरमा नेपाल सरकारले आज बिहीबारका लागि देशभर सार्वजनिक बिदा दिएको छ ।
२०७९ सालको चैत २ गते राजपत्रमा प्रकाशित सूचनाअनुसार सार्वजनिक बिदा दिने निर्णय गरेको गृह मन्त्रालयले जनाएको छ । इदको बिदा राजपत्रमै प्रकाशित भए पनि मिति भने हरेक वर्ष इस्लाम धर्मगुरुहरूले इद मनाउने मिति तय गरेपछि मात्रै यकिन हुन्छ ।
इस्लाम धर्मावलम्बीहरूले रमजान महिनाको ३० दिनको ‘रोजा’ व्रत बुधबार पूरा गर्दै आज ‘इद उल–फित्र’ मनाउनेछन् । केही मुस्लिमले ‘इद उल–फित्र’ को नमाज मस्जिदमा र केहीले ‘इदगाह’ मा सामूहिक भेला भई दुई रिकात नमाज पढेर सम्पन्न गर्छन् । नमाज पूरा गरेपछि एकअर्कालाई अङ्कमाल गरेर बधाई साटासाट गर्छन् भने घरमा विभिन्न परिकार पकाएर खाने गर्दछन् ।
रमजान महिना उर्दू पात्रोअनुसार नवौँ महिना हो । यो पर्वको ७० औँ दिनमा बकर इद अर्थात् ‘इद उल–अजहा’ पर्व मनाउने गर्दछन् । यस अवसरमा मुस्लिमहरू ‘हज’ का लागि साउदी अरेबियाको मक्का मदिना जाने पनि गर्दछन् ।
