हेटौँडाः हेटौँडा–१९, नेवारपानीबाट लागूऔषध गाँजासहित प्रहरीले एक जनालाई पक्राउ गरेको छ । पक्राउ पर्नेमा रौतहट जिल्लाको माधवनारायण–५, मिठुवाका २६ वर्षीय नूर आलम मन्सुरी रहेको बागमती प्रदेश प्रहरी कार्यालय हेटौँडाले जानकारी दिएको छ ।
सोमबार साँझ ५ बजेर ३० मिनेटको समयमा पूर्व–पश्चिम राजमार्गमा ईलाका प्रहरी कार्यालय नेवारपानीबाट प्रहरी नायव निरीक्षकको टोली र ट्राफिक प्रहरीसहितको संयुक्त टोलीले म्याग्दी जिल्लाको बेनीबाट हेटौँडातर्फ आउँदै गरेको ना ६ ख ९५४९ नम्बरको यात्रुवाहक बसलाई सुरक्षाजाँच गर्दा बसमा सवार मन्सुरीको साथबाट लागूऔषध गाँजा २ केजी बरामद गरेको जनाएको छ । लागूऔषध गाँजासहित मन्सुरीलाई नियन्त्रणमा लिई थप अनुसन्धानका लागि जिल्ला प्रहरी कार्यालय मकवानपुर लगिएको प्रहरीले जानकारी दिएको छ ।
