हेटौँडाः मकवानपुरका व्यवसायी गणेश भेटुवालको निधन भएको छ । कलेजोमा समस्या भएपछि उपचारका लागि दिल्लीमा रहनुभएका भेटुवालको मंगलबार साँझ निधन भएको उहाँका भाइ राजेश भेटुवालले जानकारी दिनुभएको छ ।
४८ वर्षको उमेरमा भेटुवालको निधन भएको हो । भेटुवालको शव दिल्लीबाट मंगलबार साँझै नेपाल ल्याइँदैछ । बुधबार साँझ ७ बजेसम्ममा भेटुवालको शव हेटौँडा ल्याइने भाइ राजेश भेटुवालले जानकारी दिनुभएको छ । निर्माण व्यवसायी भेटुवाल हेटौँडा सिमेन्ट उद्योगको अध्यक्ष समेत हुनुहुन्थ्यो ।
व्यवसायसँगै सामाजिक सेवाको क्षेत्रमा पनि क्रियाशील भेटुवाल हेटौँडा–१९, बस्तीपुरस्थित निर्मल बहुमुखी क्याम्पसका संस्थापक अध्यक्ष, बस्तीपुर जेसीज हाँडीखोलाका संस्थापक अध्यक्ष, निर्माण व्यवसायी संघ मकवानपुर र मकवानपुर उद्योग वाणिज्य संघको पूर्वउपाध्यक्ष हुनुहुन्थ्यो । भेटुवालको निधनप्रति मकवानपुरका व्यवसायी, सामाजिक व्यक्तित्वहरुले दुख व्यक्त गरेका छन् ।
