हेटौँडाः ४ नम्बर वडास्तरीय ५ ए साइड शिक्षक फुटबलको उपाधि नवोदय शिशु सदनले जितेको छ । मंगलबार भुटनदेवी माविको खेलमैदानमा भएको फाइनल खेलमा ब्रह्मदिक एकेडेमीलाई ३–० गोलअन्तरले पराजित गर्दै नवोदय शिशु सदनले उपाधि जितेको हो ।
नवोदय शिशु सदनका लागि तक्षक सिम्खडाले ह्याट्रिक गरे । उपाधि विजेता तथा उपविजेतालाई शिल्ड, मेडल र प्रमाणपत्र प्रदान गरिएको थियो । प्रतियोगितामा ७ वटा विद्यालयको सहभागिता रहेको थियो । वडा कार्यालयको आयोजना, वडा शैक्षिक गुणस्तर सुधार समितिको समन्वय तथा ब्रह्मदिक एकेडेमीको व्यवस्थापनमा प्रतियोगिता भएको हो । वडा शैक्षिक सुधार समितिका संयोजक श्रीराम दाहालको अध्यक्षता तथा संविधान सभा सदस्य अनन्त पौडेलको प्रमुख आतिथ्यमा समापन कार्यक्रम भएको थियो । कार्यक्रममा वडा अध्यक्ष नवीन सिग्देल, नेपाल रेडक्रस सोसाइटी मकवानपुरका सभापति लालबहादुर थापाको पनि आतिथ्य रहेको थियो ।
