हेटौँडाः डिजेल चोरी गर्ने दुइजनालाई मकवानपुर प्रहरीले पक्राउ गरेको छ । बारा जिल्लाको अमलेखञ्जबाट काठमाडौं लैजाँदै ना ७ ख २७९४ नम्बरको ट्याङकरबाट डिजल चोरी गर्ने हेटौँडा–९ स्थित नवदुर्गा आयल स्टोर्सका कर्मचारी भारतीय नागरिक ३० वर्षीय वीरेन्द्र साह र ट्याङकर चालक पर्सा जिल्लाको बीरगन्ज महानगरपालिका–११, श्रीपुरका ४९ वर्षीय आलम हवारीलाई प्रहरीले पक्राउ गरेको छ ।
बिहिबार दिनको १ बजेर ४० बजेको समयमा हेटौँडा–९ स्थित नवदुर्गा आयल स्टोर परिसरमा डिजेल चोरी भइरहेको भन्ने खबरका आधारमा ईलाका प्रहरी कार्यालय पशुपतिनगरबाट खटिएको प्रहरीले साह र हवारीलाई डिजेल चोरी गरिरहेको अवस्थामा नियन्त्रणमा लिएको जनाएको छ । प्रहरीले ट्याङ्करबाट निकालिएको ४० लिटर डिजेलसहित उनीहरुलाई नियन्त्रणमा लिएर नेपाल आयल निगमको थानकोटस्थित डिपो पठाइएको जनाएको छ ।
