हेटौंडाः हेटौंडा–६, चौघडास्थित सुनगाभा शिक्षा निकेतनमा खेलकुद कार्यक्रम सुरु भएको छ । मंगलबार विद्यालय व्यवस्थापन समितिका अध्यक्ष रामहरी न्यौपानेले खेलकुद कार्यक्रमको उद्घाटन गर्नुभयो ।
बिहिबारसम्म चल्ने खेलकुद कार्यक्रममा ब्याड्मिन्टन, भलिबल र एथ्लेटिक्सका खेलहरु सञ्चालन हुने विद्यालयका प्रिन्सिपल अरुण पराजुलीले बताउनुभयो । सबै कक्षा र तहका विद्यार्थीको सहभागिता रहने गरी खेलकुद कार्यक्रममा मनोरञ्जनात्मक, बौद्धिक एवम् शारीरिक विकासमा सहयोग पुग्ने किसिमका खेलकुद समावेश गरिएको छ । खेलकुदमा प्रथम, द्वितीय र तृतीय हुने विद्यार्थीलाई मेडल तथा प्रमाणपत्र प्रदान गरिनेछ ।
विद्यालयले शिक्षासँगै खेलकुदलाई पनि अगाडि बढाउने उद्देश्यले वार्षिक क्यालेण्डर अनुसार खेलकुद कार्यक्रम आयोजना गरिएको उहाँले बताउनुभयो । विद्यालयले हरेक वर्ष खेलकुद कार्यक्रमलाई शैक्षिक क्यालेण्डरमा नै समावेश गरेर सञ्चालन गर्दै आइरहेको उहाँले बताउनुभयो । नर्सरीदेखि १० कक्षासम्म अध्ययन अध्यापन हुने विद्यालयमा ६ सय ६५ जना विद्यार्थी अध्ययनरत छन् ।
