हेटौंडाः हेटौंडा उपमहानगरपालिका वडा नम्बर ७ को आयोजनामा भएको टोल बाल समूहस्तरीय नकआउट फुटबल प्रतियोगिताको उपाधी अग्राठे बाल समूहले जितेको छ । मंगलबार हेटौंडा–७ स्थित नवज्योति खेल मैदानमा भएको फाइनल खेलमा इच्छा–जागृती बाल समूहलाई ३–० गोलले हराउँदै अग्राठे बाल समूहले उपाधी हात पारेको हो ।
अग्राठेको जितमा साकेत गुरुङले २ गोल र प्रस्तुत बस्नेतले १ गोल गरे । उपाधी जितेसँगै अग्राठे बाल समूहले नगद १० हजार रुपैयाँसहित शिल्ड, मेडल र प्रमाणपत्र प्राप्त गरेको छ । त्यस्तै उपविजेता इच्छा–जागृती बाल समूहले नगद ५ हजार रुपैयाँसहित शिल्ड, मेडल र प्रमाणपत्र प्राप्त गरेको छ । प्रतियोगिताको उत्कृष्ट फरवार्ड इच्छा–जागृती बाल समूहका खेलाडी एलेक्स आचार्य घोषित भए । यस्तै उत्कृष्ट गोलरक्षक प्रगती बाल समूहका समीप बस्नेत र प्रतियोगिताको म्यान अफ द सिरिजको उपाधी अग्राठे बाल समूहका साकेत गुरुङ घोषित भए ।
प्रतियोगितामा ७ नम्बर वडास्तरिय बाल समूहका अध्यक्ष प्रिन्सप गौतम, वडाका वडा सदस्य दिनेश थापा मगर, श्यामसुन्दर परियार, नाग डाँडा युवा क्लवका संयोजक सुशील कार्की, टोल विकास संस्थाका पदाधिकारी र बाल समूहका पदाधिकारी लगायतको उपथिति रहेको थियो ।
