हेटौंडाः मकवानपुरको इन्द्रसरोवर गाउँपालिकामा आयोजित वडास्तरीय फुटबल प्रतियोगिताको उपाधी आयोजक नाटेश्वरी युवा क्लबले जितेको छ । सोमबार सम्पन्न फाइनलमा खेलमा लालिमा क्लबलाई ३–१ गोलअन्तरले हराउँदै आयोजक नाटेश्वरीले उपाधी जितेको इन्द्रसरोवर–२ का वडाध्यक्ष सुमन श्रेष्ठले जानकारी दिनुभयो ।
२ नम्बर वडा कार्यालयको आर्थिक सहयोग तथा नाटेश्वरीको आयोजनामा प्रतियोगिता भएको हो । प्रतियोगिताको विजेता बनेको नाटेश्वरीले नगद ५० हजार रुपैयाँसहित शिल्ड, मेडल तथा प्रमाणपत्र प्राप्त गरेको छ । यस्तै उपविजेता लालिमाले ३० हजार रुपैयाँ प्राप्त गरेको छ । तृतीय सिस्नेरी युवा क्लबले नगद २० हजार रुपैयाँ प्राप्त गरेको छ । गत बुधबारबाट सुरु भएको प्रतियोगितामा पालिकाभरीका ५ वटै वडाको टिमको सहभागिता रहेको थियो ।
