हेटौँडाः एसईई ग्रेडवृद्धि मौका परीक्षा सुरु भएको छ । आज शुक्रबार र भोलि शनिबार दुईदिन हुने मौका परीक्षामा सहभागी हुन १ हजार १ सय ६८ जना विद्यार्थीले फारम भरेका थिए ।
पहिलो दिनको परीक्षामा ९ सय २७ जनाले परीक्षा दिएको शिक्षा विकास तथा समन्वय इकाई मकवानपुरका प्रमुख दीनानाथ गौतमले जानकारी दिनुभयो । परीक्षा फारम भरेका मध्ये १ सय ५८ जना अनुपस्थित भएको गौतमले बताउनुभयो । एउटा मात्रै विषयको ग्रेडवृद्धि परीक्षा दिन फारम भरेका विद्यार्थीले पहिलो दिन शुक्रबार नै परीक्षा दिएका छन् भने भोलि शनिबार दुईवटा विषयको ग्रेडवृद्धि दिन परीक्षा फारम भर्ने विद्यार्थीले परीक्षा दिनेछन् ।
शिक्षा विकास तथा समन्वय इकाई ४ वटा विद्यालयमा परीक्षा केन्द्र निर्धारण गरेर परीक्षा सञ्चालन गरेको छ । एकजना विद्यार्थीले ग्रेड सी वा सो भन्दा कम कम ग्रेड प्राप्त भएका दुई वटा विषयको ग्रेडवृद्धि परीक्षा दिन पाउँछन् । कुनै दुई विषयमा अनुपस्थित भए पनि मौका परीक्षा दिन पाउने व्यवस्था गरिएको छ ।
