हेटौँडाः हेटौँडा उपमहानगरपालिकाका सवारी चालक ४१ वर्षीय सन्जु लोप्चन सुतेको अवस्थामा मृत फेला परेका छन् । आइतबार बिहान इलाम जिल्लाको सूर्योदय नगरपालिका–४, श्रीअन्तु भञ्ज्याङस्थित मुनलाईट होटलमा सुतेको अवस्थामा लोप्चन मृत फेला परेको हेटौँडा उपमहानगरपालिकाका प्रवक्ता सविन न्यौपानेले जानकारी दिनुभयो ।
लोप्चन २०७५ जेठ महिनादेखि नगरपालिकामा सवारी चालकको रुपमा कार्यरत थिए । पालिकाको स्थानीय लेखा अध्ययनको टोलीलाई लिएर लोप्चन शुक्रबार इलाम भ्रमणका लागि गएका थिए । शनिबार खाना खाएर सुतेका लोप्चन आइतबार बिहान मृत फेला परेका हुन् । नगरपालिकाको नगर प्रहरीको इन्चार्जसहित ३ जनाको टोली र मृतकको परिवार घटनास्थलमा गएको र थप विवरण आउन बाँकी रहेको न्यौपानेले बताउनुभयो ।
