हेटौंडाः हेटौंंडा–४, कर्रामा रहेको आइसोलेसन वार्डका ४७ जनाको कोरोनाको लिखित रिपोर्ट केहीबेरमा आउने भएको छ । मकवानपुरका ४४ जना, बाराको २ जना र रौतहटका १ जनाको रिपोर्ट आउने भएको हो ।
हेटौंडा–१० मा रहेको कोरोना प्रयोगशालामा भएको परिक्षणमा पोजेटिभ र नेगेटिभ छुट्टाउन समस्या भएपछि दोहोर्याएर परिक्षणग गर्न चितवनको भरतपुरमा रहेको प्रयोगशालामा स्वाब पठाइएको थियो ।
चितवनको प्रयोगशालाबाट परिक्षण भई रिपोर्ट हेटौंडा आउँदै गरेको स्रोतको भनाई छ । हेटौंंडा–१० मा रहेको कोरोना परिक्षण ल्याबमा भएको मेशिन अन्य क्षेत्रहरुमा भन्दा उत्कृष्ट रहेको मानिएको छ । बागमती प्रदेशको सामाजिक विकास मन्त्रालयका कोभिड–१९ का प्रवक्ता डा. पुरुषोत्तम सेढाईले पनि मेशिनको गुणस्तर कायम रहेको बताउनुभएको छ । प्रयोगशालामा विज्ञहरु अहिलेको आवश्यकता अनुसार ठिकै रहेतापनि आवश्यकता अनुसार परिक्षण दोहोर्याउनुपर्ने सामान्य रहेको उहाँको भनाई छ ।
यता स्रोतका अनुसार हेटौंडामा कोरोना परिक्षण गर्न प्रयोग हुने केमिकलका कारण समस्या देखिएको हो । यसअघि पनि कोरोना परिक्षण गर्दा सबैको लिखित रिर्पोट दिने गरिएको थियो । मौखिक रुपमा भने सबैको रिपोर्ट नेगिटिभ आएको भनिएतापनि लिखित रुपमै केहीबेरमा सबैको रिपोर्ट आउने हेर्टौंडा स्थित आइसोलेसन वार्डका संयोजक भोला चौलागाईले बताउनुभयो ।
