हेटौँडाः मकवानपुरको बकैया गाउँपालिकामा मालबाहक ट्रक र हेटौँडा–११, नवलपुरमा मोटरसाइकल दुर्घटना भएको छ । मंगलबार बिहान १ बजेर ३० मिनेटको समयमा हेटौँडा–सिन्धुली सडकखण्डको बकैया गाउँपालिका–३, तीनतलेमा सिमेन्ट लोड ट्रक दुर्घटना भएको हो ।
नवलपरासीबाट सिमेन्ट लोड गररी सिन्धुली जाँदै गरेको ना ८ ख ४०९६ नम्बरको ट्रक ब्रेक फेल भएर सडकबाट करिब ५० मिटर तल खसी दुर्घटना भएको हो । दुर्घटनामा कुनै किसिमको मानवीय क्षति नभएको प्रहरीले जनाएको छ । यस्तै मंगलबार बिहान १२ बजेर ४५ मिनेटको समयमा हेटौँडा–११, नवलपुरमा ना ३९ प १८९७ नम्बरको मोटरसाइकल दुर्घटना भएको छ । दुर्घटनामा परी मकवानपुर जिल्लाको बकैया गाउँपालिका–४, छतिवनका ३२ वर्षीय जनक बहादुर स्याङ्तान घाइते भएका छन् । घाइते स्याङ्तानलाई उपचारका लागि चुरेहिल अस्पताल पठाइएको प्रहरीले जानकारी दिएको छ ।
