हेटौंडाः काठमाडौंमा जारी राष्ट्रपति रनिङ सिल्ड बागमती प्रदेशस्तरीय प्रतियोगितामा सोमबार मकवानपुरलाई थप दुई स्वर्ण र दुई रजत प्राप्त भएको छ । सोमबार बिहान भएको खेलमा एथलेटिक्सतर्फ मकवानपुरलाई दुई स्वर्ण र दुई रजत प्राप्त भएको मकवानपुर जिल्ला खेलकुद विकास समितिका कार्यालय प्रमुख माधव कोइरालाले जानकारी दिनुभयो ।
एथलेटिक्स अन्तर्गत महिलातर्फको १ सय मिटर दौडमा बिना गोपाली र पुरुष ज्याभलिङ थ्रोमा सुमन योञ्जनले मकवानपुरका लागि स्वर्ण जितेका हुन् । योञ्जनले ४४ फिट थ्रो गर्दै प्रथम भएका हुन् । योञ्जन पुरुषतर्फको ८ सय मिटर दौडमा द्वितीय भए भने पुरुषतर्फकै १ सय मिटर दौडमा सुजन राई द्वितीय भए ।
महिलातर्फ २ सय मिटर दौडमा मकवानपुरकी विना गोपाली, पुरुष २ सय दौडमा आयुष नेगी र जितेश सापकोटा फाइनल प्रवेश गरेका छन् । नेगीले आइतबार मकवानपुरका लागि १ सय मिटर दौडमा स्वर्ण पदक दिलाएका थिए। यस्तै ४ सय मिटर रिले दौडमा पनि नेगी, सुमन योन्जन, दिपेश राई र सुजन राई समूहले पनि स्वर्ण पदक जितेका थिए । प्रतियोगिता अन्तर्गत मकवानपुरले सोमबार दिउँसो कबड्डी र भलिबलमा पनि प्रतिस्पर्धा गर्दैछ ।
