हेटौंडाः मकवानपुरको इन्द्रसरोवर गाउँपालिकामा मोटरसाइकल दुर्घटना हुँदा एक महिलाको मृत्यु भएको छ । मृत्यु हुनेमा मोटरसाइकलमा पछाडी सवार दाङ जिल्लाकी २३ वर्षीया आशिका चौधरी रहेको प्रहरीले जनाएको छ ।
काठमाडौंबाट हेटौंडातर्फ जाँदै गरेको बा ७३ प ९०६० नम्बरको मोटरसाइकल अनियन्त्रित भई दुर्घटना भएको हो । मोटरसाइकल सडकबाट १० मिटर तल खसेको थियो । चौधरीको घटनास्थलमै मृत्यु भएको हो । दुर्घटनामा मोटरसाइकल चालक ओमकुमार रानामगर समान्य घाइते रहेको प्रहरीले जनाएको छ । मगरलाई प्रहरीले नियन्त्रणमा लिएको छ । चौधरीको शव हेटौंडा अस्पतालमा पठाइएको जिल्ला प्रहरी कार्यालय मकवानपुरले जनाएको छ ।
