हेटौंडाः पूर्व–पश्चिम राजमार्गअन्तर्गत मकवानपुरको मनहरी गाउँपालिका–६, रामडाँडामा शुक्रबार बिहान ट्रकको ठक्करबाट स्कुटर चालकको मृत्यु भएको छ । शुक्रबार बिहान साढे ६ बजेको समयमा चितवनबाट हेटौंडातर्फ जाँदै गरेको ना ५ ख ३५५७ नम्बरको डिब्बा ट्रकले विपरित दिशाबाट जाँदै गरेको गा १५ प ३९६९ नम्बरको स्कुटीलाई ठक्कर दिँदा स्कुटी चालकको घटनास्थलमै मृत्यु भएको हो ।
स्कुटीलाई ठक्कर दिने ट्रक र चालकलाई प्रहरीले नियन्त्रणमा लिएको जनाएको छ । सवारी चालक अनुमतिपत्रका आधारमा मृतक स्कुटी चालक कास्की जिल्लाको पोखरा महानगरपालिकाकी ३८ वर्षीया अमृता परियार भएको प्रहरीले उल्लेख गरेको छ । मृतकको शव हेटौंडा अस्पतालमा पोस्टमार्टमका लागि पठाइएको प्रहरीले जानकारी दिएको छ ।
