हेटौंडाः लागुऔषधसहित मकवानपुर प्रहरीले दुईजनालाई पक्राउ गरेको छ । शुक्रबार बिहान ५ बजेको समयमा हेटौंडा–१०, बसपार्कस्थित रोशन होटलबाट बारा जिल्लाको निजगढ नगरपालिका–७ की २८ वर्षीया सुस्मा तिमल्सिना र मकवानपुर जिल्लाको हेटौंडा उपमहानगरपालिका–८, कमानेका ३८ वर्षीय जंग बहादुर तामाङलाई प्रहरीले पक्राउ गरेको हो ।
उनीहरुको साथबाट प्रहरीले लागुऔषध कोडिविल १०० मिलिलिटरका ५० बोतल बरामद गरेको छ । तामाङ र तिमल्सिनाले प्रयोग गर्ने ना ३७ प ६७०३ नम्बरको मोटरसाइकल पनि नियन्त्रणमा लिएको प्रहरीले जानकारी दिएको छ । लागुऔषध कारोबार भइरहेको भन्ने सूचनाका आधारमा प्रहरीले होटलको कोठामै पुगेर छापा मारेको हो । लागुऔषधसहित पक्राउ परेका दुवैजनालाई प्रहरीले हिरासतमा राखी अनुसन्धान गरिरहेको जनाएको छ ।
