प्रहरी चौकी रातोमाटे मकवानपुरबाट खटिएको प्रहरी टोलीले लागूऔषध निट्राजेपा र मोटरसाइकलसहित २ जनालाई नियन्त्रणमा लिएको छ । बुधबार बिहान १ बजेर ४५ मिनेटको समयमा हेटौंडा १५ रातोमाटे चेकपोईन्ट स्थित सडकखण्डमा पथलैयाबाट हेटौंडातर्फ आउँदै गरेको प्रदेश २–०३–००९ प ७८९६ नम्बरको मोटरसाईकल रोकी सुरक्षा जाँच गर्ने क्रममा प्रहरीले लागूऔषध निट्राजेपा फेला पारेको थियो ।
प्रहरीले मोटरसाइकल चालक सर्लाही जिल्लाको मलंगवा नगरपालिका–१० बस्ने २१ वर्षीय राजु झा र सोही मोटरसाइकलको पछाडी सवार १९ वर्षीय अनिल कुमार यादवलाई शंका लागि सुरक्षा जाँच गरेको थियो । उनीहरुको साथबाट प्रहरीले लागूऔषध निट्राजेपा १६० ट्याब्लेट फेला पारेको जनाएको छ । उक्त लागूऔषधसहित उनीहरुलाई नियन्त्रणमा लिई जिल्ला प्रहरी कार्यालय मकवानपुर ल्याईएको थियो । जिल्ला अदालत मकवानपुरबाट १८ दिनको म्याद थप गरी अनुसन्धान कार्य भई रहेको जिल्ला प्रहरी कार्यालय मकवानपुरले जनाएको छ ।
