हेटौंडाः यू–१८ एसियाली रग्बी सेभेन्स च्याम्पियनसिपमा सहभागी मकवानपुरका रग्बी खेलाडीहरुलाई सम्मान गरिएको छ । बिहीबार जिल्ला खेलकुद विकास समिति मकवानपुरका अध्यक्ष वेश खड्गी र मकवानपुर जिल्ला रग्बी संघका अध्यक्ष लिलाकुमार घलानले खेलाडीहरुलाई स्वागत तथा सम्मान गर्नुभएको हो ।
मंसिर २४ गते र २५ गते काठमाडौंको त्रिपुरेश्वरस्थित दशरथ रंगशालामा भएको एसियाली रग्बी च्याम्पियनसिपमा मकवानपुरका रग्बी खेलाडीहरु राष्ट्रिय टिमबाट खेलेका थिए । नेपालको तर्फबाट महिला रग्बी टिमकी कप्तान मकवानपुरकी मनिसा घिसिङसहितको टोलीलाई सम्मान गरिएको हो ।
टिमका खेलाडीहरु सिशा लोप्चन, सुस्मा पाख्रिन, सुमिना पाख्रिन, ज्योति बोम्जन र विपिशा योञ्जनलाई सम्मान गरिएको छ । यस्तै पुरुष टिमतर्फका खेलाडी अवि राईलाई स्वागत तथा सम्मान गरिएको छ । आठ राष्ट्र सहभागी प्रतियोगितामा नेपाल सातौं भएको थियो ।
