हेटौंडाः मकवानपुर प्रहरीले अवैध लागूऔषधसहित दुई जनालाई पक्राउ गरेको छ । पक्राउ पर्नेमा हेटौंडा–१२ तिनताप्केका २१ वर्षीय अबिन थिङ र ३४ वर्षीय प्रताप घलान रहेको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिनुभयो ।
बुधबार साँझ ६ बजेर ३० मिनेटको समयमा हेटौंडा–१२ तिनताप्केस्थित भित्री सडकखण्डमा लागुऔषध कारोबार भएको भन्ने विशेष सूचनाको आधारमा जिल्ला प्रहरी कार्यालय मकवानपुरबाट प्रहरी निरीक्षक बिक्रम खड्का मगरको कमाण्ड र विशेष प्रहरी टोलीसहितको संयुक्त टोली खटेर पैदल हिँडिरहेको थिङलाई नियन्त्रणमा लिई सुरक्षाजाँच गर्दा उसले बोकेको झोलाबाट लागूऔषध नुरफिन ५० एम्पुल, डाईजोपाम ५० एम्पुल, फेनारगन ५० एम्पुल फेला पारेको थियो ।
थिङसंगै रहेको सोही ठाउँका घलान प्रहरीलाई देख्नसाथ भागेको र घलान पनि कारोबारमा संलग्न रहेको भनी थिङले खुलाएपछि घलानलाई खोजतलास गर्दै जाने क्रममा घलानको घरको शौचालय माथि लुकाई–छिपाई राखेको थप लागुऔषध नुरफिन ५४ एम्पुल, डाईजोपाम ६३ एम्पुल, फेनारगन ५७ एम्पुल फेला पारेको प्रहरीले जनाएको छ । पक्राउ परेका दुबै जना नियन्त्रणमा लिई थप अनुसन्धान गरिरहेको प्रवक्ता कार्कीले बताउनुभयो ।
