हेटौंडाः मकवानपुरमा जिल्लास्तरीय भलिबल प्रतियोगितामा आज बुधबार उद्घाटन खेल हुँदैछ । हेटौंडा–४, हुप्रचौरस्थित भलिबल कोर्टमा हुने पहिलो उद्घाटन खेलमा दुम्सीडाँडा क्लब र हुप्र भेट्रान्स टिमबीच प्रतिस्पर्धा हुनेछ ।
उद्घाटन खेल जेसीआई बसामाडीका अध्यक्ष चिराग अग्रावलको सभाध्यक्षता तथा हेटौंडा उपमहानगरपालिकाकी प्रमुख मिनाकुमारी लामाको प्रमुख आतिथ्यतामा हुने खेल संयोजक सरोज पौडेलले बताउनुभयो । प्रतियोगिताका संयोजक सरोज पौडेलका अनुसार लिग–कम–नकआउटका आधारमा हुने प्रतियोगितामा सहभागी टिमलाई दुई समूहमा विभाजन गरी लिग चरणको खेल खेलाइनेछ ।
प्रतियोगिताको सेमिफाइनल खेल पुस १ गते हुनेछ भने फाइनल खेल पुस २ गते हुनेछ । प्रतियोगितामा प्रथम हुने टिमले नगद ६५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ भने द्वितीय हुने टिमले नगद ३० हजार रुपैयाँ प्राप्त गर्नेछन् ।
