हेटौंडाः स्वतन्त्र पत्रकार संघको केन्द्रीय उपमहासचिवमा निर्वाचित हुनुभएका सुरेश श्रेष्ठलाई सम्मान गरिएको छ । बुधबार स्वतन्त्र पत्रकार संघ मकवानपुरले एक कार्यक्रमको आयोजना गरी श्रेष्ठलाई सम्मान गरेको हो ।
स्वतन्त्र पत्रकार संघ मकवानपुरको संस्थापक अध्यक्ष समेत रहनुभएका श्रेष्ठ हेटौंडाबाट प्रकाशित हुँदै आएको समृद्ध समाज राष्ट्रिय दैनिकका सम्पादक, रेडियो निकास ९३.४ मेगाहर्जका स्टेशन म्यानेजर हुनुहुन्छ । उहाँ हेटौंडा–२ स्थित मकवानपुर बहुमुखी क्याम्पसमा पत्रकारिता तथा आमसञ्चार विषयको सहायक प्राध्यापक समेत हुनुहुन्छ । स्वतन्त्र पत्रकार संघ मकवानपुरका अध्यक्ष गोकुल अधिकारीले संघको केन्द्रीय उपमहासचिवमा निर्वाचित श्रेष्ठलाई बधाई दिनुहुँदै अहिले जिल्लामा कार्यरत स्वतन्त्र पत्रकारहरुको व्यक्तित्व विकास, क्षमता विकासमा ध्यान दिनुपर्ने बताउनुभयो । यस्तै स्वतन्त्र रुपबाट पत्रकारिता गर्न केन्द्रबाट आवश्यक सहयोगको अपेक्षा लिएको अधिकारीले बताउनुभयोे ।
सम्मान ग्रहणपछि उपमहासचिव श्रेष्ठले पत्रकार स्वतन्त्र हुुनुपर्ने बताउनुभयो । पत्रकारले कसैको आस्थालाई लिएर समर्थन वा विरोध गर्ने नभई राम्रो काम गर्नेको प्रशंसा र नराम्रो काम गर्नेको आलोचना गर्नुपर्ने बताउनुहुँदै उपमहासचिव श्रेष्ठले केही दिनपछि पोखरामा संघको बैठक बस्ने योजना रहेकोे बताउनुभयो । संघको केन्द्रीय समितिले स्वतन्त्र पत्रकार संघको जिल्ला अध्यक्षहरुको भेला राखेर योजना तर्जुमा गरिने बताउनुभयो ।
