हेटौंडाः मकवानपुर प्रहरीले अवैध लागुऔषधसहित ३ जनालाई पक्राउ गरेको छ । फरक–फरक मितिमा हेटौंडाका विभिन्न स्थानबाट लागुऔषधसहित ३ जनालाई पक्राउ गरेको हो ।
आइतबार दिउँसो २ बजेर १५ मिनेटको समयमा प्रहरी चौकी बसपार्कबाट खटिएको प्रहरी टोलीले गस्ती गर्दै जाने क्रममा हेटौंडा –१० बसपार्कमा बसिरहेको अवस्थामा बकैया–४ छतिवन घर भई हाल हेटौंडा–११ थानाभर्याङ डेरा गरी बस्ने ३३ वर्षिय लक्ष्मण घलानलाई लागुऔषधसहित प्रहरीले पक्राउ गरेको छ । घलानको साथमा रहेको झोला प्रहरीले सुरक्षाजाँच गर्दा झोलामा लुकाई छिपाई ल्याएको लागुऔषध नुफिन १ सय एम्पुल, डाइजेपाम १ सय एम्पुल, फेनारगन १ सय एम्पुल र नाईट्रोभेट १ सय ५ वटा ट्याबलेट फेला परेको जनाइएको छ । उक्त लागूऔषध सहित घलानलाई नियन्त्रणमा लिई थप अनुसन्धान गरिरहेको जिल्ला प्रहरी कार्यालय मकवानपुरले जनाएको छ ।
यस्तै, शुक्रबार साँझ ७ बजेको समयमा बिशेष सुचनाको आधारमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौंडा –१५ पिपलबोट स्थित पूर्व पश्चिम सडकखण्डमा वीरगंजबाट हेटौंडातर्फ आउँदै गरेको ना १४ प ३१६४ नम्बरको मोटरसाईकललाई रोकी सुरक्षाजाँच गर्ने क्रममा हेटौंडा –११ का २८ वर्षिय सविन पहाडीले लुकाई छिपाई ल्याएको लागूऔषध खैरो हिरोईन जस्तो देखिने पदार्थ ५ ग्रामसहित प्रहरीले पक्राउ गरेको छ । पहाडीलाई उक्त लागूऔषध खैरो हिरोईन जस्तो देखिने पदार्थ, मोटरसाईकलसहित नियन्त्रणमा लिई थप अनुसन्धान गरिरहेको प्रहरीले जनाएको छ ।
यस्तै, शनिबार साँझ ५ बजेर ३० मिनेटको समयमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा–४ पारिजातपथस्थित पैदल हिँडिरहेका हेटौंडा–५ शान्तिनगरका १९ वर्षिय युवराज चौलागाईलाई शंका लागि सुरक्षाजाँच गर्दा लागुऔषध फेला परेको जनाइएको छ । चौलागाईँले लगाएको पाईन्टको खल्तीमा लुकाई छिपाई ल्याएको लागूऔषध नाईट्रोभ्याट (४५ ट्याबलेट) फेला परेको प्रहरीले जनाएको छ । उक्त लागूऔषध नाईट्रोभेट सहित चौलागाईँलाई नियन्त्रणमा लिई थप अनुसन्धान गरिरहेको प्रहरीले जनाएको छ ।
