हेटौंडाः मकवानपुरको बागमती गाउँपालिका वडा नम्बर ८ को वडाध्यक्षमा नेकपा एमालेका इन्द्रमणी तिमल्सिना विजयी हुनु भएको छ । आज शुक्रबार बिहान निर्वाचन अधिकृतको कार्यालय बागमतीले सार्वजनिक गरेको परिणाम अनुसार ६ सय ६५ मत प्राप्त गरी तिमल्सिना वडाध्यक्षमा विजयी हुनु भएको हो ।
अर्का अध्यक्षका प्रत्यासी नेकपा माओवादी केन्द्रका पूर्ण बहादुर थिङले ६ सय ४९ र नेपाली कांग्रेसका शुक्र राज पाख्रीनले ३ सय ७५ मत प्राप्त गरेका छन् । यस्तै, सदस्यहरुमा माओवादी केन्द्रका धन बहादुर पाख्रिन, जय बहादुर लोप्चन, महिला सदस्यमा सुनिता नेगी र दलित महिला सदस्यमा कमला माया बिश्वकर्मा विजयी भएका छन् । वडामा १ हजार ८ सय ७९ मत खसेको थियो । बागमती गाउँपालिकाको अध्यक्ष तर्फ माओवादी केन्द्रले ६ हजार ५ सय ६४, नेकपा एमालेले ५ हजार २ सय ६२ मत प्राप्त गरेका छन् । मत गणना अझै जारी रहेको छ ।
