हेटौंडाः चितवनको भरतपुरमा जारी त्रिपक्षिय एकदिवसिय भरतपुर मेयर कप क्रिकेट प्रतियोगितामा मकवानपुरले लगातार दोश्रो विजय हासिल गर्दै फाइनलमा आफ्नो स्थान पक्का बनाएको छ । आज भएको खेलमा मकवानपुरले घरेलु टोली चितवनलाई ४४ रनले पराजित गरेको हो ।
टस जितेर ब्याटिङ गरेको मकवानपुरले ४१ दशमलब १ ओभर मा सम्पुर्ण विकेट गुमाइ २ सय २१ रन बनाएको थियो । ब्याटर शुभ कंशकारले ४१, विशाल फुँयालले ३६, आकाश घिमिरेले ३१ तथा कप्तान राम नरेश गिरिले २५ रनको योगदान गरेका थिए । बलिङतर्फ चितवनका गौतम केसीले सर्वाधिक ३ विकेट लिएका थिए। २ सय २२ रनको लक्ष्य पक्ष्याएको चितवन ३३ दशमलब ४ ओभरमा सम्पुर्ण विकेट गुमाएर १ सय ७७ रनमा सिमित भएपछि मकवानपुरले जीत हासिल गरेको हो ।
बलिङ तर्फ मकवानपुरका रिजन ढकालले ३ तथा रामनरेश गिरि, अशिम श्रेष्ठ र विपुल खनालले समान २/२ विकेट लिएका थिए । कप्तान राम नरेश गिरि प्लेयर अफ द म्याच घोषित भएका छन् । यसअघि हिजो सम्पन्न खेलमा मकवानपुरले नवलपुरलाई १ सय १६ रनले पराजित गरेको थियो । विहिबार हुने फाइनल खेलमा मकवानपुरले नवलपुरको सामना गर्नेछ ।
